BUNGE MAALUMU LA KATIBA KIPIMO CHA KUCHAGULIWA TENA 2015

Picha / Maktaba

WABUNGE wa kuchaguliwa ambao pia ni wajumbe wa Bunge Maalumu la Katiba watapimwa na watanzania kama kweli ni wazalendo kwa nchi yao au ni wazalendo kwa vyama vyao.
Watapimwa jinsi watakavyokuwa wanachangia ibara mbalimbali za rasimu, rasimu ambayo inakwenda kuwa katiba ya nchi (sheria mama).
Watanzania wa maeneo wanapotoka wabunge watapimwa Je, anafaa kurudi bungeni 2015?
Kama kweli wabunge wa kuchaguliwa wanaupenda ubunge wao wanatakiwa wachangie michango yao kama watanzania, sio kama wabunge wa kutoka chama fulani.
Wabunge mnatakiwa kuingia kwenye Bunge maalumu la katiba mkijua mnawakilisha watanzania million 43, sio kuwakilisha vyama vyenu vya siasa, makundi yenu, taasisi zenu, NGO’s zenu, makundi maalumu yenye malengo yanayofanana au wachawi wenzenu mliwawakilisha.
Kusema ukweli mkiingia na mawazo ya kuwawakilisha makundi niliyoyataja hapo juu makundi ambayo wamewaingiza hapo hamtarudi mjengoni tena 2015.
Kumbukeni Watanzania wa 2005 sio hawa wa leo 2015, kwa hiyo kuweni makini na michango yenu mnapojadili rasimu, rasimu ambayo imetokana na watanzania na ikumbukwe pia rasimu hii haikutokana na ninyi wabunge wa Bunge maalumu la katiba.
Mkumbuke pia baadhi yenu wabunge mlichaguliwa kwa madhumuni ya kutunga sheria na kuisimamia serikali na mmeingizwa katika Bunge hili na sheria siyo na Watanznaia.
Nikiwa na maana mmebadilisha masharti ya kombati, mashati ya kijani na bluu na mkavaa nguo za jadi lakini bado ninyi ni wale wale wenye asili ya kubishana hata kwa jambo dogo sana. 
Kubadilisha mashati ya vyama vyenu hakubadishi mawazo yenu mnabaki wale wale.  Sasa msipoacha tabia ya kubishana/kuvutana hata kwa jambo la ukweli.
Mfano: 1 + 1 = 2 lakini mwingine anaweza akatokea akasema 1 + 1 = 11 halafu mkaanza kubishana na baadaye mbishano/mvutano kuamuliwa kwa 2/3.
Ikitokea 2/3 wamekubaliana 1 + 1 = 11 maana yake  11 itakuwa jibu sahihi, sijui kama watanzania tutawaelewa.
Nawasihi wajumbe wa Bunge maalumu la katiba kuacha kubishana na kuvutana kwa mambo ambayo yako wazi hasa yale ambayo yana manufaa kwa watanzania kwani mnawakilisha watu wengine ambao hawana vyama kabisa.
Nawasihi kwa namna ya pekee wajumbe wa Chama tawata (CCM) kwani ninyi ndio mko wengi.
Mkumbuke pia ninyi ni wajumbe wa Bunge la “kihistoria” kwa kuwa Tanzania hatujawahi kuwa na bunge kama hili tangu tupate uhuru 1961, kwa hiyo mnayo heshima ya pekee, kwani hili ni bunge la kwanza la kupitisha rasimu ya watanzania kuwa katiba yao; Mnaombwa kulinda heshima hiyo ya kipekee.
Aidha napendekeza ili kulinda heshima ya bunge hili, yale mambo ambayo yanaonekana yana mabishano/mvutano wa hoja kwa mfano aina ya muungano wanaotaka watanzania na maadili ya viongozi wa umma na yale yote yatakayoonekana ya mawazo tofauti yasiamuliwe na 2/3 ya wajumbe, badala yake liundwe jopo la majaji 11 toka nje ya bunge hilo ambalo litakuwa na kazi ya kupima uzito wa hoja ya mzungumzaji na kutoa alama.
Na mwisho wa mabishano/mvutano majaji watatoa uamuzi wa upande upi imeonekana una hoja nzito na kwa manufaa ya watanzania wote na uamuzi huo usionekane kuwa upande umeshindwa, ila hoja yao imekuwa nyepesi na haina maslahi si tu kwa yule aliyekuwa anatetea jambo au alikuwa anapinga jambo hilo bali ni watanzania wote.  
Kuamua kwa kutumia 2/3 itakuwa ni sawa na mfano wa wanafunzi wawili wanabishana/wanavutana moja anasema 1 + 1 = 2 na mwingine hesabu hiyo hiyo ya 1 + 1 = 11 halafu ubishani/mvutano huo uamuliwe kwa kura 2/3 ya wanafunzi darasani, na aliyesema 1 + 1 = 11 akashinda Je, litakuwa ni jibu sahihi? Kwa kuwa 2/3 ya wanafunzi wameamua jibu ni 11?
Nia njema ya Rais Kikwete kuwatengenezea watanzania katiba yao inaweza kugeuka majanga kama wajumbe wa bunge hili la katiba watakuwa mnabishana na ukweli.
Na kusababisha Rais Kikwete badala ya kuingia katika historia ya kuwaletea watanzania katiba yao, akaingia kwenye historia nyingine kabisa ambayo hata mimi siombei kabisa.
Na wataomwingiza katika hoja kati ya historia hizo ni ninyi wabunge wa bunge maalumu la katiba.
Likiundwa jopo la majaji 11 kuamua mambo yenye mvutano badala ya 2/3 litamwingiza Rais Kikwete katika historia nzuri ya kuwapatia watanzania katiba waitakayo na kusababisha pia wapate Tanzania waitakayo.
Ila mambo yakiamuliwa kwa kura 2/3 utashangaa 1 + 1 = 11 badala ya 1 + 1 = 2, na kuharibu mchakato mzima wa kumwingiza Rais Kikwete katika historia na “sisemi ibara zote ziamuliwe jopo la majaji hapana” ninasema “ibara ambazo zitakuwa na mvutano mkali hasa suala la aina ya muungano na maadili ya viongozi, “ndiyo maamuzi yake yaamuliwe na jopo la majaji baada ya kupima uzito wa hoja za pande zinazovutana au kubishana badala ya kutumia 2/3 ya wajumbe wa bara na Zanzibar.
Pendekezo la kutumia majaji badala ya 2/3 ni kuepuka ushabiki  wa vyama kwa wajumbe kupiga kura kwa upande wa mjumbe wake badala ya kupigia kura uzito  wa hoja kwa manufaa ya watanzania milioni 47.
Jopo la majaji nililopendekeza litoke nje na wajumbe hao lijumuishe wanasheria, watu wa haki za binadamu, viongozi wa dini na watu wanaoaminiwa na umma.
Nawatakia kila la heri “Bunge maalumu la Katiba”