WATU sita wamefariki dunia papo hapo na zaidi ya 12 kujeruhiwa katika ajali mbaya iliyohusisha magari manne.Akizungumzia tukio hilo lililotokea jana eneo la Makongo, jijini Dar es Salaam, Kamanda wa Polisi Mkoa wa Kinondoni, Camillius Wambura, alisema kuwa ajali hiyo ilitokea baada ya daladala inayofanya safari kati ya Tegeta Nyuki na Ubungo lenye namba T 441 CKT, kuhama njia kutokana na breki zake kushindwa kufanya kazi.
Kamanda Wambura alieleza kuwa baada ya daladala hiyo kuhama njia, ilishia kuligonga daladala jingine lenye namba za usajili T 377 BEF aina ya Nissan lililokuwa likitokea Makumbusho kwenda Kunduchi katika ubavu wa kulia.
Alisema kuwa baada ya kugonga ubavuni, daladala hilo liliyumba na kwenda kuligonga kwa nyuma gari jingine aina ya Toyota Discover lenye namba za usajili T 454 AWZ.
Wambura alisema kuwa miili ya marehemu sita waliofariki ambao ni wanawake watatu na wanaume watatu, imehifadhiwa katika Hospitali ya Lugalo na majeruhi ambao ni wanaume nane na wanawake wanne wanaendelea kupatiwa matibabu katika hospitali hiyo.
Alisema kuwa dereva na kondakta waliokuwa kwenye gari ambalo lilisababisha ajali hiyo hawakupatikana.
0 Comments